Fraszki po śląsku o Nowym Dworze

[Heimat]

Nowy Dwor Mazowiecki

Kaj se do ty Wisły Bug i Narew wlywo
Tam i grod takowy niyjednego dziwo.


Nowy Dwor Mazowiecki 1355

Zajta historyji łotwarto z tym rokym
Choć na prawa miejske trza było poczekać
Dyć we koncu przidom - to nastympnym krokym
Tako mieszczaninym uwidzom czowieka.


Nowy Dwor Mazowiecki 1374

"Dwor" se tako grodym stowo
Niychej miasto rośnie zdrowo.


Dziedzina rosła

Na handlu zbozym i solom rosła
Z tym do znaczynio poleku doszła
Toż i komora celno tu była
Coby Korona tyż niy traciyła.


Kościoł św. Michała Archanioła 1792

Zocno świontynia ciyngym tu majom
Klasycyzmowi istny tyz pszajom
Zawadzki tako jom projektowoł
Archanioł Michał w opiece stowoł.


Św. Izydor

W nowodworskim kościele łobroz Izydora
Łod downa go majom - przeca niy łod wczora.


Modlin

Z Nowym Dworym Mazowieckim
Tako dzisioj skuplowany
Dyć to wiedzom nawet dziecki
- Ku łobronie piyrwyj dany.


Twierdza Modlin 1807

W czas napoleoński tako budowano
Chnetko rokow dwiesta ty dziedzinie dano.


Modlin 4.XII.1830

Powstańce twierdza tako chyciyli
"Listopadowcow" nadzieje marne
Choć se w Modlinie fest rozgościyli
Dyć przeca prziszły dni dlo nich marne.


Modlin 20.IX-9.X.1831

Warszawa padła - Modlin se broni
Skory niy sprzedo przeca łon toni.


Nowogieorgijewsk 1834

Toż pokozali swoje Rosjany
Terozki Modlin ze takim mianym
Dyć twierdza ze tym drapko tyż rośnie
Coby niy marzoł Polok ło wiośnie.


Nowogieorgijewsk 1864

Toż twierdza ze tym juzaś fest rośnie
Todtleben tako rozbudowuje
Możno niy wszyskim ze tym radośnie
Czy Sewastopol tu istny czuje?


Twierdza pierściyniowo 1878-1880

Mo forteca małe forty
Pierściyń taki wiela worty
Cybulice Małe tako
Ze Kosewym w tym jednako
Te Grochale i Janówek
Małocice, Pomiechówek
Tyż Zakroczym i Dymbina
Z tym warowno fest dziedzina.


Modlin "Pierściyń zewnyntrzny" 1912-1914

Toż przed piyrszom wojnom samom
Łon dlo nowych fortow "mamom"
Dziesiyńć z dalsza ich stanyło
Zdo sie - wszysko wojskym żyło.


100 tysiyncy wojokow

Tu armijo wielko stoła
Ponoć wroga se niy boła
Generałow tyż dość wiela
Bo trzidziści miała sztela.


W tydziyń

Niymce w tydziyń Modlin wziyli
Ruski marnie se tu biyli
Już niy cara a kajzera
Tako twierdza richtig teraz.


W 1939

Armjo "Modlin" twierdzy broni
Skory tu niy sprzedo toni
Chnet do końca września czimie
Bioły oreł dyć kajś drzymie
Zdo sie - ciynżko łon raniony
Furgnoł jakby w inksze strony.


Do dzisioj

Do dzisioj wojsko znaczy tu wiela
Chnet rokow dwiesta momy ta sztela.


Zobytek

Toż tako gryfny zobytek momy
Na zatracynie twierdzy niy domy.


Twierdza zobytkowo

Ano - dwiesta rokow już twierdzy klupnyło
Tako zobytkowe chnet wszysko co było
I aże do dzisioj se nom tu łostało
Możecie mi wierzyć - richtig to niymało.


Koszary

Długość fasady jako tu zmierzyć?
Niy styknie miary - możecie wierzyć.


Reduta Napoleona 1813

Dano naszym czasom
Czy tu duchy straszom?


Działobitnie 1839

Jako kanony stowiać tu trza
by szło zrachować - piyńćdziesiont dwa?


Kasyno 1875

Powojowoł tu bych yno
Trza miec w zocy te kasyno.


Wieże i bramy twierdzy

Ano - ciynżko porachować
Dyć na muster trza je dować
Tyż som przeca zabytkowe
Niyroz dziwo se im czowiek.


Stacjo gołymbi pocztowych

Same flugi to za mało
Se briftryjgrow we nich miało.


Hajźle

Tu i hajźle zabytkowe
Jak se wysrać w nich mo czowiek?

[otomato]

Nowodworska Perło w Mazowsza Koronie
Przepadł ten, którego zechciałaś porazić
Ukojeniem Narwi w Matki Wisły łonie
Jakże Twoje piękno inaczej wyrazić?